വീടുമരം

മരം
ഒരു വീടാണ്

വേരച്ഛൻ
നീരും അന്നവും തേടി
ദേശാടനം നടത്തുന്നവൻ

തടിയമ്മ
ഇലകുഞ്ഞുങ്ങളെയും
പൂ പൈതങ്ങളെയും
പോറ്റി വളർത്തുന്നവൾ

ഒരോ ഇലയ്ക്കും
ഓരോ പൂവിനും
അവർ പേര് വെച്ചിട്ടുണ്ടാവും
പേര് ചൊല്ലി വിളിക്കുന്നുണ്ടാവും

കാറ്റ് പറഞ്ഞ കഥകൾ
മുതിർന്ന ഇലകൾ
കുഞ്ഞിലകൾക്ക്
പറഞ്ഞുകൊടുക്കുന്നുണ്ടാവും

തങ്ങൾ മരിച്ച് പോവുന്നതല്ല
അച്ഛനെ തിരഞ്ഞ്
പോവുന്നതാണെന്ന്
പഴുത്തിലകൾ പച്ചിലകളെ
വിശ്വസിപ്പിക്കുന്നതിനാലാവണം
പഴുത്തിലകൾക്കൊപ്പം
ചിലപച്ചിലകളും
ഞെട്ടറുത്ത് വീഴുന്നത്

വെയിലത്തും മഴയത്തും
മരച്ചോട്ടിൽ തന്നെ
കിടക്കാൻ ഭാഗ്യം കിട്ടുന്ന
ഇലകൾക്കാവും
അച്ഛന്റെ അടുത്തെത്താൻ
കഴിയുന്നതും
കുഞ്ഞിലകളായി വീണ്ടും
ജനിക്കാൻ കഴിയുന്നതും