മഴയുപ്പ

എത്ര ചായ്ച്ചു കെട്ടിയാലും

പൂമുഖത്ത് കയറി ഇരിക്കാതെ
മഴ പെയ്ത് പോവാറേയില്ല

മുറ്റത്തെ ചെടികളും
തൊടിയിലെ വിത്തുകളും
കാത്ത് കാത്തിരുന്നിരുന്ന
ഒരു മഴയുപ്പയുണ്ടായിരുന്നു

ചാരുകസേരയിലെ
തുണിശീലയില്‍
തലയിലെ മെഴുക്ക്‌ മണം
ഇപ്പോഴുമുണ്ടാവണം

ഇടയ്ക്ക് സ്വപ്നത്തില്‍
അതിനുമിടയില്‍ ആള്‍ക്കൂട്ടത്തില്‍
എത്രയോ പേരുടെ
ശബ്ദങ്ങള്‍ക്കിടയില്‍ നിന്നും
ഉമ്മാക്കും മക്കള്‍ക്കും
വേര്‍ തിരിച്ചെടുക്കാനാവുന്ന
ഒരു ചുമ മുഴങ്ങി അലിയാറുണ്ട്

ദ്രവിച്ച പട്ടികച്ചീളിലൂടെ
ഇളകിയ ഓടിന്‍ വിടവിലൂടെ
കരിപിടിച്ച ഉത്തരത്തിലൂടെ
കുമ്മായമടര്‍ന്ന ചുമരിലൂടെ
മഴ ചോരുന്നെന്ന് പറയരുത്
അവരുപ്പയെ തിരയുന്നതാണ്.