തുലാസ്

ആവശ്യത്തിന്റെ
തട്ടെപ്പോഴും താഴത്താണ്

നേട്ടങ്ങളെപ്പോഴും
ഭാരമില്ലാതെ മേലെയും

താഴത്തെ തട്ടില്‍
കുറെ കണ്ണുകള്‍
മേല്‍പോട്ട് തന്നെ നോക്കി നില്‍ക്കുന്നു

മുകളില്‍ നിന്നും
ഖനിയിലെ കല്‍ക്കരി
അവസ്ഥാന്തരം പ്രാപിച്ച്
പുറം തള്ളുന്ന
നാണയ തുട്ടുകളാണവരുടെ നോട്ടം

മുകളില്‍ ഖനി തുരന്ന് തുരന്നയാള്‍
വക്കുകളിടിഞ്ഞു മൂടപ്പെട്ടപ്പോഴും
അവസാനമായി കിട്ടിയ
നാണയ തുട്ടിലേക്കായിരുന്നു കണ്ണുകൾ

ഇപ്പോള്‍ മുകള്‍ തട്ടും താഴെ തട്ടും
ഒരേ രേഖയിലെത്തി
തുലാസിന്റെ സൂചി
ചലനമറ്റ് കൃത്യമായി