വല്ല്യുമ്മ

കാച്ചി തുണീടെ
കോന്തലയിൽകെട്ടിവെച്ച
സ്നേഹത്തിന്റെ മധുരമാണ്

വിറയാർന്ന കൈകളിൽ ഒളിപ്പിച്ച
സാന്ത്വനത്തിന്റെ പച്ചമരുന്നാണ്

എന്റെ വികൃതിത്തരങ്ങൾക്ക്
വേലികെട്ടിയ കാവലാണ്

പനിച്ചു പൊള്ളുമ്പോഴും
തന്നിരുന്ന ചുംബനങ്ങളുടെ
തണുപ്പാണ്

പല്ലില്ലാത്ത ചിരിക്കൊപ്പം
കുലുങ്ങി ചിരിച്ചിരുന്ന
കാതിലെ ചിറ്റുകളാണ്

ഉപ്പാനെയാ ഉമ്മാനെയാ
കൂടുതലിഷ്ടമെന്ന ചോദ്യത്തിന്‌
സംശയമില്ലാത്ത ഉത്തരമാണ്

ചേക്കുട്ടിപ്പാപ്പാന്റെ
വീര കഥകളുടെ
നിലവറയാണ്

ഉപ്പയും കൂട്ടരും ചുമന്നു പോയ
വല്ല്യുമ്മാനെ കാത്ത്
ഞാനിന്നും ഉമ്മറ പ്പടിയിലിരിപ്പാണ്

Picture courtesy = Ente vallimma page