ഒരു ദിനം തുടങ്ങുന്നത്

കണ്ടു തീരാത്ത
ഒരു കിനാവിൽ നിന്നാവും ഉണരുക

ഓർത്തെടുക്കാനാവാത്ത
തുടർച്ചയുടെ ചിത്രങ്ങൾ
വരച്ചെടുക്കാനാവാതെ
മിഴി വീണ്ടും തുറക്കുന്നത് മുതലാണ്‌
ഒരു ദിനം തുടങ്ങുന്നത്

പിന്നെ, തലയ്ക്കു മീതെ
ഉയർത്തിപ്പിടിച്ച ഒരു കപ്പ്
വെള്ളത്തിനടിയിൽ നിന്നും
ചിന്തകൾ കൊറിക്കാൻ തുടങ്ങും

ഇടക്കിടറി വീഴുന്ന
സ്ഥലകാലബോധത്തോടെ
''ബഫർ'' ചെയ്തിടം വരെ ഓടുന്ന
ഓണ്‍ലൈൻ ചലചിത്രം പോലെ
ജീവിതം മുന്നോട്ടായും

ഇരുപത്തഞ്ചു മിനുട്ടിന്റെ
കാൽനടദൂരത്തിലേക്ക്
ചിന്തകൾ മൂടിയ വഴിയിലൂടെ
എതിരെയുള്ള കാഴ്ചകളെ മറികടന്ന്
ശകടത്തിനടുത്തെത്തും

ചില്ലു ജാലകത്തിൽ
തല ചായ്ക്കുന്നത് മുതൽ
വീട് പണിയുടെ ആരവം കേൾക്കും
''ഞാനിന്ന് സ്കൂളിൽ പോണില്ലെന്ന്''
മോൻ ചിണുങ്ങും
കവിളിൽ വായു നിറച്ച്
കുത്തി പൊട്ടിക്കാൻ മോൾ
മുഖം നീട്ടും
''എത്ര നേരായി ഭക്ഷണം
എടുത്ത് വെച്ച് കാത്തിരിക്കുന്നു''
എന്നവൾ പരിഭവിക്കുമ്പോഴാവും
സൈറ്റിലെത്തുക