Monday, September 16, 2013

ബാച്ചിലർ മുറിയിൽ


പാത്രങ്ങൾക്ക്
അകവശം മാത്രമേ
തിളക്കം കാണൂ

ചോറിനു മുകളിൽ
ഒരൊറ്റ മത്തി
ശവാസനത്തിൽ കിടക്കും

അടുക്കളയിൽ
കഴുകി വെക്കാൻ മറന്ന
ഒരു ചായക്കപ്പുണ്ടാവും

ടോയ്ലറ്റിൽ
എടുക്കാൻ മറന്ന
ടൂത്ത് ബ്രഷും സോപ്പും
സംഘർഷം സൃഷ്ടിക്കും

ചാനലുകളിൽ
വാർത്തകൾ വായിച്ചത് വീണ്ടും
വായിച്ചു കൊണ്ടേ ഇരിക്കും

ഒരു കാരണവർ
ഉപദേശത്തിന്റെ
വ്യർഥമായ ശാസന തുടരും

വോയ്പ് കോളിൽ
രണ്ടാത്മാക്കൾ
കുറുകി രമിക്കുന്നുണ്ടാവും

തലയിണകൾക്ക്
ചുമരിനോട് ചേർന്ന വശത്ത്
ഉപ്പുനീരുപിടിച്ച കല്ലിപ്പുണ്ടാവും


*ചിത്രം കടപ്പാട് = ഗൂഗിൾ

No comments:

Post a Comment