വീട്ടിലേക്കുള്ള വഴി

മണ്ണിന്റെ മതിലുകളിൽ
പച്ചപ്പായലുകൾ പടർന്ന്
ഇടവഴിക്കിരു വശവും
അലങ്കരിച്ചിട്ടുണ്ടാവും

ശാന്തേച്ചീടെ വീടിനടുത്ത്
വെള്ള മഷിത്തണ്ട്
പൊട്ടിക്കാനാളില്ലാതെ
പടർന്നിട്ടുണ്ടാവും

രാമവിലാസിലെ
കടലാസ് പൂക്കൾ
മതിലിനപ്പുറത്ത് നിന്നും
വഴിയിലേക്കെത്തിനോക്കുന്നുണ്ടാവും

ആനപ്പറമ്പിൽ
തേന്മാവിന് ചുറ്റും ഒരു കാറ്റ്
ഞാൻ വരുമ്പോൾ ഒരു മാമ്പഴം
തട്ടി വീഴ്ത്താനെന്നോണം
വട്ടമിട്ടു നിൽക്കുന്നുണ്ടാവും

കറുകപ്പുല്ലുകൾ അതിരിട്ട
നടവരമ്പിൻ ചെരുവിൽ
ഞണ്ടുകളിപ്പോഴും
ഓടിക്കളിക്കുന്നുണ്ടാവും

വലിയ കുളത്തിൽ
എന്റെ ചൂണ്ട പൊട്ടിച്ച് പോയ
''കണ്ണൻ'' ഇടക്ക് വെള്ളം കടിച്ച്
പോവുന്നുണ്ടാവും

വീട്ടു പടിക്കലമ്മ
വഴിയിലേക്ക് മിഴി നട്ട്
കാത്തിരിപ്പാവും