സ്വപ്നങ്ങൾ

സ്വപ്നങ്ങൾ പാതിയിലാവും
എപ്പോഴും അവസാനിക്കുക
രംഗങ്ങൾ ശരിയായി
ക്രമീകരിക്കാത്ത സിനിമപോലെ

ഒരാന പിറകെ കുത്താൻ വരും
ഇടവഴിയിൽ എത്ര ഓടിയാലും
നീങ്ങാതെ നിൽക്കുമ്പോഴാവും
തീർത്തും വ്യത്യസ്തമായ
ഒരു രംഗം തെളിയുക

ലൈബ്രറിയിൽ പുസ്തകം
മറിച്ചു നോക്കുമ്പോഴാവും
പുസ്തകതാളിലൂടെ അവൾ
ഇറങ്ങി വന്ന് അടുത്തിരിക്കുക

മിണ്ടി തുടങ്ങുമ്പോഴേക്കും കാണാതാവും
പിന്നെ തിരഞ്ഞു പോയിട്ടൊടുവിൽ
കുന്നിൻ ചെരുവിലൂടെ മുകളിലെത്തും
മറു തലക്കിൽ പൊടുന്നനെ
ഒരു കൊക്ക പ്രത്യക്ഷപ്പെടും
അതിലേക്ക് വീണ് ഒരു പാറക്കല്ലിൽ
തല ഇടിക്കുമ്പോഴാവും നമ്മൾ ഉണരുക

കാണണം എനാഗ്രഹിക്കുന്നവ
കാണാതിരിക്കുകയും
കാണാൻ ഇഷ്ടമില്ലാത്തവ
കാണുകയും ചെയ്യുന്ന
അനിയന്ത്രിതമായ ദൃശ്യാനുഭവമാവും
പലപ്പോഴും സ്വപ്‌നങ്ങൾ