തിരഞ്ഞു പോവുന്നത്

ഡാ ഹര്യേ ,

അന്ന് നമ്മള്
വാലീമ്മേ നൂല് കെട്ടി വിട്ട
തുമ്പി എന്തായാവോ ല്ലേ

കോട്ടക്കുന്നിന്റെ മോളീന്ന്
കൈവിട്ടപ്പോ പോയ
ആ പട്ടം
അതെവ്ട്യാവും

നെന്റെ വീടിന്റെ മുറ്റത്തെ
പുളിമരത്തിന്റെ പൊത്തില്
ഞാൻ നാല് ഗോട്ടി വെച്ച്ർന്നു ട്ടാ
അതവടെ ണ്ടോ ആവോ

മ്മള് കേട്ടിക്കൂട്ടീണ്ടാക്ക്യ
ഏറു പന്ത്
സൈനത്താടെ തൊടീല്
പ്പഴും ണ്ടാവും
അതാ പാമ്പിന്റെ പുറ്റിന്റെ
അടുത്താർന്നില്ലേ കെടന്നത്

എന്ത് രസാർന്നു ല്ലേ
ആ കാലം
ആനക്കട്ടി മൂച്ചീമ്മൽത്തെ
തേൻമുട്ടി കുടിക്കണ മാങ്ങ പോലെ

ഇപ്പൊ ,
കാട്ടു കൊളത്തിന്റെ
ഓവ് ചാലില്
മ്മള് വെച്ചിർന്ന കുരുത്തി വലേല്
പെട്ടിർന്ന മീൻ പോലായി
എത്ര ചാട്യാലും തിരിച്ചു
പോവാൻ പറ്റാണ്ടായി