ചിന്തകൾ

കുളിമുറിയിൽ
ആദ്യത്തെ കപ്പു വെള്ളം
ദേഹത്തൊഴിക്കാൻ
തലയ്ക്കുമീതെ
പിടിച്ച് നിൽക്കുമ്പോഴാവും
ചിന്തകളിൽ നിന്നും ഓരോരുത്തരായി
ഇറങ്ങി വന്നു ചുറ്റും നിൽക്കുക

പിന്നെ ,
അവരോട് സംവദിച്ച് നിൽക്കും

വാതിലിനു പുറത്ത് നിന്നും
അടുത്ത ഊഴക്കാരൻ
അകത്തെ ഒച്ചയനക്കം
കേൾക്കാത്തതിനാൽ
കതകിൽ തട്ടുമ്പോഴാണ്
കൈയിൽ പിടിച്ച കപ്പിലെ വെള്ളം
ഇനിയും ഒഴിച്ചില്ലെന്നു തിരിച്ചറിയുക

കപ്പിനും തലയ്ക്കുമിടയിൽ
ഇങ്ങിനെ എത്രയെത്ര
സമയങ്ങളാണ്
ചിന്തകൾ തിന്നു തീർക്കുന്നത്