Wednesday, February 19, 2014

തിരിച്ചു പോക്ക്

പുഴ
ആർത്തലച്ചു കരഞ്ഞപ്പോൾ
കോണ്ക്രീറ്റ് തൂണുകളിൽ
ഒട്ടിയമർന്ന മണൽ
കുതറി ഇളകി ഒത്തുകൂടി
കൈതത്തോട് വഴി
പുഴയിലേക്ക് തിരിച്ചൊഴുകി

കുന്ന്
നിലവിളിച്ച് കൊണ്ടിരുന്നപ്പോൾ
മണ്ണ്, നികത്തിയ
പാടത്ത് നിന്നെഴുനേറ്റ്
വരമ്പിലൂടെ പുത്തൻ ചെത്ത് വഴി
സാമ്യാര് കുന്നിൽ തന്നെ ചെന്ന് കയറി

കാട്
വിലപിച്ച് നടന്നപ്പോൾ
ഗൃഹോപകരണ കടയുടെ
ചില്ല് കൂടുകൾ തകർത്ത്
തടികഷ്ണങ്ങൾ
മരമായി പരിണമിച്ച്
കാണിചുരം വഴി
നീലിമലയിലേക്ക് പോയി

മഴ പെയ്തു
കാട് കുളിർത്തു
കുന്ന് പൂത്തു
പുഴ ഒഴുകി..

No comments:

Post a Comment