ഞാൻ മരിച്ചു എന്നുറപ്പായാൽ...

കണ്‍പോളകൾ അടക്കുക
നിന്നെ കണ്ടിട്ട് കൊതി തീരാത്ത
അവ ഞാൻ സ്വയമടക്കുന്നതെങ്ങിനെ

വായ അടച്ച് തുറക്കാതിരിക്കാൻ
കീഴ് താടിയിലൂടെ കെട്ടണം
നീ ആർത്തലച്ചു കരയുമ്പോൾ
എന്റെ ഗദ്ഗദം പൊട്ടിപ്പോയാൽ
നിന്നെ അത് കൂടുതൽ വേദനിപ്പിച്ചാലോ

ചെവി അടക്കരുത്
പറഞ്ഞാലും തീരാത്ത നിന്റെ
കഥകൾ കേട്ട് എനിക്കുറങ്ങണം

കൈകൾ നിവർത്തി നേരെ വെക്കണം
നിനക്ക് തലയിണക്കായി
എന്റെ വലതു കൈ
ഞാനറിയാതെ നിവർത്തിപ്പോയാലോ

കാലുകൾ മടക്കു നിവർത്തി
തള്ളവിരലുകൾ കൂട്ടി കെട്ടണം
ഭയപ്പാടില്ലാതെ നിനക്ക് വിശ്രമിക്കാൻ
നിന്നിലേക്ക്‌ ഞാനവ നീട്ടി വെച്ചാലോ