കവിത എഴുതുന്നവനെ പ്രണിയിക്കുകയെന്നാൽ

കവിത എഴുതുന്നവനെ
പ്രണിയിക്കുകയെന്നാൽ
കാൽപ്പനികതയുടെ
ഒറ്റപ്പെട്ട ദ്വീപിലേക്ക്
കുടിയേറിപ്പാർക്കുക എന്നാണ്

മൗനങ്ങളുടെ ബോഗികൾ
ചേർത്ത് കെട്ടിയ തീവണ്ടിയിൽ
ഒറ്റയ്ക്ക് യാത്രപോവുക എന്നാണ്

അകാശത്ത് നിന്നിറങ്ങിവരുന്ന
ഇല്ലാത്ത ഗോവണിവഴി
അറിയാത്ത ദേശത്തേക്ക്
തീര്‍ത്ഥാടനം ചെയ്യുക എന്നതാണ്

കാണാത്ത
കടലതിരുകളിലേക്ക്
കാലുകളില്ലാത്ത
പാലം പണിയുക എന്നാണ്

സർവ്വോപരി
ഇഹലോകവാസം
വെടിയുക എന്ന് കൂടിയാണ്