കാണാതായ ഒരാളെ തിരയുമ്പോൾ

കാണാതായ ഒരാളെ
തിരയുമ്പോൾ
അപകടങ്ങളിൽ നിന്നെല്ലാം 
അയാൾ രക്ഷപ്പെട്ട്
സുരക്ഷിതമായൊരിടത്ത്
അവളെ കാത്തിരിക്കുന്നുണ്ടാവുമെന്ന്
അവൾ വിശ്വസിക്കും

തിരഞ്ഞ്
നടക്കുന്നതിനിടയിൽ
അമ്മേ എന്ന വിളികേട്ടെന്ന്
എന്റെ കുഞ്ഞിവിടെതന്നെയുണ്ടെന്ന്
അവിടെ ഒന്ന് നോക്കെന്ന്
അമ്മവയറെരിയും

തിരഞ്ഞ് തിരഞ്ഞിടയിൽ
അവനിപ്പൊ കയറിവരും
ഇങ്ങ് വരട്ടെ
അവന്റെയീപോക്ക്
ഇന്നത്തോടെ നിർത്തുമെന്ന്
അച്ഛൻ ചങ്ക് പൊട്ടും

കാത്ത് കരഞ്ഞ്
കാണാതൊടുവിൽ
ഞാനിനി മിണ്ടില്ലെന്ന്
എന്നെ കൂട്ടാതെയീ
അച്ഛനിതെവിടേക്കാ പോയേ ന്ന്
മോള് തളർന്നുറങ്ങും

അയാളപ്പോൾ
ശരീരത്താൽ ഉപേക്ഷിക്കപ്പെട്ട്
കരച്ചിലുകൾ തോർത്താനെന്നോണം
ആർത്തലച്ച് പെയ്യുന്നുണ്ടാവും