മഴതോര്‍ന്ന് പെയ്യുന്ന രാത്രികള്‍

മഴ പെയ്ത് തോര്‍ന്ന
രാത്രികളില്‍
കുളിച്ചീറനായകാറ്റ്
വയല്‍വരമ്പിലൂടെ
ഓടിക്കളിക്കാറുണ്ട്

തവളകള്‍ക്ക്
രാത്രിമുഴുവന്‍ ആഘോഷമാണ്
തൊണ്ടവീര്‍പ്പിച്ച് ഉച്ചത്തിലവര്‍
പുലരുവോളം പാടിക്കൊണ്ടിരിക്കും
ചീവീടുകള്‍ താളം പിടിച്ചുകൊണ്ടിരിക്കും

മഴയ്ക്കും
പൊടുന്നനെ പെയ്യുന്ന
നിലാവിനുമിടയ്ക്ക്
രാത്രിയിലൊരു നിശ്ശബ്ദത
പിറക്കാറുണ്ട്
മഴ കേട്ടിരുന്ന ആത്മാക്കള്‍
കുഴിമാടങ്ങളിലേക്ക്
മടങ്ങിപ്പോവുന്ന ഇടവേളയാണത്

പിന്നെയും നിലാവ് തോരും
മഴ പെയ്യും
കുളത്തിലേക്കും പുഴയിലേക്കും
ഒഴുകുന്ന വരിവെള്ളത്തില്‍
പരല്‍മീന്‍ കുഞ്ഞുങ്ങള്‍
കൂട്ടമായി കയറിപ്പോവും

ഇടയ്ക്കൊരു വരാല്‍
അതിന്റെ
വാലില്‍ കടിച്ചൊരു കൂട്ടുകാരി
വീട് വിട്ട് പോവും
അവരെ തിരഞ്ഞെന്നോണം
ഒത്തിരിവരാല്‍ കൂട്ടങ്ങള്‍
പിറകെയും പോവാം

മഴതോര്‍ന്ന് പെയ്യുന്ന രാത്രികള്‍
മണ്ണിന്‍റെ ഉത്സവക്കാലമാണ്